近期股市波動，但暫時未見對樓市構成太大影響，而樓市走勢一向落後於股市，假若樓市大跌，是否為入市時機？《壹》仔就找來《易經》研究專家蘇家興批批狗年本港樓市走勢，他直指今年香港內部易出問題，建議將物業放沽！ 

蘇大師表示：「今年香港有個醜事傳千里之象，即係香港內部容易出問題，去到國際間會評論甚至負評。另外喺交通系統同電子交易系統容易出故障，特別喺節氣三、六、九、十二月。大家如果有做電子交易就有小心啲，公司管理要留意伺服器會唔會出現問題。」 

蘇更明言，今年絕對不宜置業，只適宜租樓：「今年主要因《澤雷隨》，上卦係金，下卦係木，整支卦係缺水。加上戊戌年天干、地支都係土，五行嘅水重重被土尅害；加上風水計算，今年紫白卦理，九紫離火入中宮，水就變得好弱。為了救助水，令運氣更強，就要留意，原來置業係屬土的、租樓係屬水，而今年要旺嘅話，就要租樓將物業放沽，就可以將運勢提升。」 

他解釋，租樓最少租兩年以上，因為租一年過短，對人的健康無益處、甚至有害：「我就唔會暗示樓市有咩上落，但我只係從《易經》卦象考慮，因為今年擁有物業，唔係對自己有利嘅部署，只係將自己嘅資金鎖死喺不動產上，對整體投資靈活度減弱。」 而不少分析都指北水湧港推升樓市，蘇就指：「今年中國未必有咁多資金能夠來港，所以如果想依賴北水的話，今年可能會有失望情況。」